استاذن العراف عندي قصيده

السلام عليكم ورحمة الله وبركاته


ولكم هذه القصيده اتمنى ان تنال اعجابكم



استاذن العراف عندي قصيده=نقحتها عن كل عيب ومشاريه
قصيدة" تحمل بيوت" عديده=فيها حكم والرجل عقله يقديه
اشوف انا الايام هاذي عنيده=وراع الهقاوي تخلفه عن هقاويه
والنجس لو هو نجس ترفع رصيده=وايصير كل" وده انه يعانيه
لو البخل نهجه ونفسه زهيده=ما يندب الا باسم حضرة معاليه
والا الكريم اللي صفاته حميده=يطرد ورا رزقه ويادوب يكفيه
ولا احتاج مايشفيه حتى عضيده=وكل"ن" تبرا منه حتى مواليه
هاذا زمانن كل طيب يصيده=والا ردي الناس تكبر علابيه
فيه الردي مجده وعزه يشيده=والا الشجيع يهد عالي مبانيه
جهل عقول اهل العقول الرشيده=ورزن عقول اهل العقول المسافيه
والكاذب النمام شغل بريده=يجيب من هاذا وهاذا يوديه
وليا سمع له علم ناقص يزيده=لانه ابليس بنقل الاخبار معنيه
وراع المنافق والحيل زاد كيده=يجمل لك المظهر وشره بخافيه
والمؤتمن بوقه يغذي وريده=ومستامنه للحق لوجاه ينفيه
والصدق بين الناس وقته مبيده=والكذب بين الناس كثرت مواريه
لا كن عزيز النفس روحه مجيده=ما همته دنياه لو كان تشقيه
يصبر لحكم اللي يدبر عبيده=والصبر محمود العواقب لماشيه
ونهاية الانفس لحاجه وحيده=مهما يطول العمر فالموت قافيه
واللي حياته شر واللي سعيده=يجمعهم البرزخ ويصبح مساويه
واللي غني واللي قليل" حصيده=كل"ن" على فعله يجازيه واليه
والرابح الساعي لفعل" يفيده=في يوم مايشفيه عمه ولا بيه
وترا النبادم ما يسمى فقيده=ان كان ما ذكره يخلد لهاليه
والعاقل الباني لمجده بجيده=ما تاه في درب الطياشه ولاالتيه
ومن يحترم ذاته يسمى وليده=ومن لا احترم ذاته ترا الخلق تهفيه
ومن لا يخاف الشتم يوم الوعيده=بالشتم خلق الله وباالهرج توذيه
ومن لا ظلم يظلم وكلمه اكيده=ويصبر على الحسره ويكره مباديه
ويندم على الايام لوهي رغيده=من يبذل المعروف في غير راعيه
ورجل بلا حكمه وقوه شديده=ترا اضعف العربان تطمع توطيه
ورجل بدون اخلاق واريا سديده=ماتحمد افعاله ولا ايضا مساعيه
ورجل" تزود علم ياطيب فيده=حيث التعلم قلب راعيه يحيه
العلم نهضه للعقول البليده=يوم الجهل لاحتل له شي ينهيه
هذا وصلوا عد نبت الجريده=على رسول نبه الخلق تنبيه